نئی دہلی 3اپریل(ایس او نیوز؍ آئی این ایس انڈیا) سپریم کورٹ نے ایس سی ایس ٹی ایکٹ کے بارے میں 20 مارچ کا اپنا فیصلہ ملتوی کرنے سے آج انکار کر دیا اور کہا کہ مرکز کی نظر ثانی کی درخواست پر دس دن بعد تفصیل سے سماعت کی جائے گی۔ جسٹس آدرش کمار گوئل اور جسٹس اودے یو للت کے بنچ نے اس فیصلے کی مخالفت میں کل مظاہروں کے دوران ملک بھر میں بڑے پیمانے پر تشدد کا ذکر کرتے ہوئے کہا کہ مظاہرہ کر رہے لوگوں نے فیصلہ ٹھیک سے پڑھا ہی نہیں ہے اور وہ موجود شر انگیز عناصر کی طرف سے گمراہ کردیئے گئے ہیں۔ بنچ نے کہا کہ اس نے ایس سی ایس ٹی ایکٹ کے کسی شرائط کو نرم یا کمزور نہیں کیا ہے؛ بلکہ صرف معصوم افراد کو گرفتاری سے بچانے کے لیے ان کے مفادات کی حفاظت کی ہے۔ بنچ نے کہا کہ قانون کی دفعات کا استعمال معصوم لوگوں کو دہشت زدہ کرنے کے لئے نہیں کیا جا سکتا ہے۔ عدالت عظمی نے مرکزی حکومت کی نظر ثانی والی درخواست دس دن بعد وسیع سماعت کیلئے درج کرتے ہوئے مہاراشٹر اور دیگر فریقوں سے کہا کہ وہ اس دوران اپنی دلیل کی تحریری دلیلیں داخل کریں۔ مرکزی حکومت نے اپنی نظر ثانی درخواست میں کہا ہے کہ 20 مارچ کے عدالت کے فیصلہ میں اس قانون کی دفعات کو نرم کرنے کے دور رس نتائج ہوں گے۔ اس سے ایس سی ایس ٹی کے ارکان پر اس کا منفی اثر پڑے گا۔ عدالت نے اپنے فیصلے میں اس قانون کے تحت مقدمات میں گرفتاری کی فراہمی کے غلط استعمال کا نوٹس لیتے ہوئے کہا تھا کہ ’لوک سیوک‘ کو اس کی تقرری کرنے والے اتھارٹی کی منظوری کے بعد ہی گرفتار کیا جا سکتا ہے۔